TibbMedia.az-a daxil olan şikayətdə Mərkəzi Neftçilər Xəstəxanasının stomatologiya şöbəsində çalışan bir qrup həkim ixtisar qərarından narahat olduqlarını bildirərək, icbari tibbi sığorta sistemində stomatoloji xidmətlərə münasibətin yenidən nəzərdən keçirilməsini tələb edirlər.

Şikayət müəlliflərinin sözlərinə görə, uzun illər dövlət səhiyyəsinə xidmət etmiş, bəzilərinin 35 ildən artıq əmək stajı olan stomatoloqlara ştatların ləğv olunduğu bildirilib. Onların iddiasına əsasən, aylıq əməkhaqqı cəmi 538 manat olsa da, bir çox həkimin kredit, icarə və digər maliyyə öhdəlikləri var və bu qərar onların ailələrini ciddi sosial problemlərlə üz-üzə qoyur.

Həkimlər bildirirlər ki, söhbət dövlət büdcəsinə əlavə yük yaradan strukturdan getmir.

Onların sözlərinə görə, şöbə uzun illər kassa sistemi ilə fəaliyyət göstərib, istifadə olunan stomatoloji qurğular, avadanlıqlar və alətlərin böyük hissəsi həkimlərin şəxsi vəsaiti hesabına alınıb. Kabinetlərin təmiri də onların hesabına aparılıb.

Şikayət müəllifləri qeyd edirlər ki, buna baxmayaraq, kassa sistemi üzrə əldə olunan gəlirlərdən onların əməkhaqlarına hər hansı əlavə ödənilməyib.

Bununla yanaşı, həkimlər illər ərzində şəhid ailələrinə, qazilərə və digər imtiyazlı kateqoriyadan olan vətəndaşlara ödənişsiz xidmət göstərdiklərini də vurğulayırlar.

Problem yalnız bir şöbənin taleyi deyil

Bu müraciət daha ciddi bir sualı yenidən gündəmə gətirir.

- Nəyə görə Azərbaycanda icbari tibbi sığorta stomatoloji xidmətlərin böyük hissəsini hələ də əhatə etmir?

Halbuki ağız və diş sağlamlığı ümumi sağlamlığın ayrılmaz hissəsidir. Müalicə olunmayan diş xəstəlikləri ürək-damar sistemi xəstəlikləri, şəkərli diabet, infeksiyalar və digər ciddi problemlərin yaranmasına və ağırlaşmasına səbəb ola bilir.

Buna baxmayaraq, minlərlə vətəndaş stomatoloji müalicəni öz hesabına ödəməyə məcbur qalır.

Bu isə aztəminatlı ailələrin vaxtında həkimə müraciət etməsinə mane olur.

- İcbari tibbi sığorta nəyi qoruyur?

Əgər əsas arqument maliyyə yüküdürsə, sual yaranır:

- Vaxtında göstərilməyən stomatoloji yardım nəticəsində yaranan ağır xəstəliklərin müalicəsi dövlətə daha azmı başa gəlir?

- Profilaktik müalicə daha ucuz olduğu halda, niyə sistem ağırlaşmış xəstəliklərin yaranmasını gözləyir?

Səhiyyə ekspertlərinin də dəfələrlə vurğuladığı kimi, profilaktika və erkən müdaxilə uzunmüddətli perspektivdə səhiyyə xərclərinin azalmasına xidmət edir.

Bu baxımdan stomatoloji xidmətlərin mərhələli şəkildə icbari tibbi sığorta paketinə daxil edilməsi həm vətəndaşların sosial müdafiəsini gücləndirə, həm də dövlət səhiyyə müəssisələrinin fəaliyyətini daha dayanıqlı edə bilər.

Həkimlər cavab gözləyirlər

Şikayət müəllifləri bildirirlər ki, cəmi on nəfərdən ibarət olan kollektiv illərlə bu şöbəni formalaşdırıb. Onların fikrincə, hazırda verilən qərar təkcə iş yerlərinin ixtisarı deyil, illərlə formalaşmış peşəkar kollektivin dağılması deməkdir.

Onlar aidiyyəti qurumlardan aşağıdakı suallara aydın cavab gözləyirlər:

- Ştatların ləğv edilməsinin iqtisadi və hüquqi əsaslandırması nədir?

- Özünü maliyyələşdirən şöbənin bağlanması hansı zərurətdən irəli gəlir?

- İcbari tibbi sığorta stomatoloji xidmətləri niyə tam əhatə etmir?

- Bu sahənin sığorta paketinə daxil edilməsi üçün hansı maneələr mövcuddur?

- Uzun illər dövlət səhiyyəsinə xidmət etmiş həkimlərin sosial müdafiəsi necə təmin olunacaq?

TibbMedia.az məsələ ilə bağlı qarşı tərəfin – aidiyyəti qurumların da mövqeyini dərc etməyə hazır olduğunu bildirir. Mövzunu diqqətdə saxlayacağıq.